Sääʹmnuõri čeäʹppvuõttpeiʹvv 1970 – looǥǥast ääʹljeeʹl
Sääʹmnuõri čeäʹppvuõttpeiʹvv lij leämmaž vääžnai teivvam päiʹǩǩen juʹn sõrgg vittlo eeʹǩǩed. Šõddmõš nâânad päärnai da nuõri kulttuur- da čeäppõstuejjstõõllmõõžžid, õʹhttekuullivuõđ da sääʹm identiteeʹtt. Sääʹmnuõri čeäʹppvuõđpeeiʹvest lij tuõđi jõnn miârktõs nuõri jieʹllmest sääʹmkulttuur seʹst.
.jpg)
Čeäʹppvuõđpeeiʹv lie hääʹsǩes da mooutʼteei šõddmõõžž
Škooulin lie valmštõõttâm obb škoouleeʹjj vieʹsslõs di mooutʼteei šõddmõõžž diõtt. Uʹčteeʹl tuärjjee da vuäʹpste nuõrid. Šõddmõš oudd nuõrid vueiʹttemvuõđ õõuʹdeed tääideez da čuäʹjted tõid jeärrsid. Čeäʹppvuõttpeivva kååččat puk sääʹmpäärnaid da -nuõrid di sääʹmǩiõl mättʼtõõzzâst da sääʹmǩiõl klaassi päärnaid da nuõrid.
Čeäʹppvuõđpeiʹvv lij sääʹmnuõri teivvampäiʹǩǩ
Sääʹmnuõri čeäʹppvuõttpeiʹvv kuuli aalǥâst jeeʹres vuʹvddšõddmõõžživuiʹm väʹlddkååddlaž nuõri čeäʹppvuõttpeeiʹvi kuällsa. Ååʹn tõt lij vueʹssen Nuõrr kulttuur- säiʹmmõõzzâst seämma tääʹzzest ǥu jeeʹres vuʹvddšõddmõõžž, koin vaʹlljee õudsteeiʹjid ǩiiđ väʹlddšõddmõʹšše leʹbe mieʹrriijji riâššum Škooul Jõnnprääʹznka.
Vueiʹvvteeʹmm meäʹrrââvv väʹlddkååddlaž šõddmõõžž tanss-, musikk- leʹbe teaʹtterteeʹm mieʹldd, koonn lââʹssen prograammâst lij pâi mii-ne jeäʹrben sääʹmkulttuuʹre õhttneei teeʹmm. Sääʹmnuõri čeäʹppvuõđpeeiʹv mieʹrren ij kuuitâǥ leäkku tåʹlǩ äʹrbbvuõđlai tuâjai da tuåimi kâddmõš, tõn diõtt määŋgnallšem čeäʹppõs-sueʹrj lie vuârvuârai mieʹldd. Sääʹm teeʹmmen lie leämmaž õm. karttčeäppõs, tivttǩeâštt, musikkjoouk, kartträidd, vuäʹnkõsfiiʹlm, roolpihttâz, sääʹmpihttâz- da ǩiõtt-tuejjčuäjtõõzz, juõigg- da musikktuâjjpääʹj.
Čeäʹppvuõđpeeiʹv väʹlddriâššjen lij Sääʹmteeʹǧǧ škooultõs- da mättmateriaalkoontâr. Riâššmõʹšše vuässõʹtte še säʹmmlai dommvuud kååʹdd. Sääʹmnuõri čeäʹppvuõttpeiʹvv kooll škoouleeʹjj tuâjjprograʹmme da šõddmõõžžid ââʹnet škooulneäʹttel äiʹǧǧen. Sääʹmnuõri čeäʹppvuõttpeeiʹv di väʹlddkååddlaž šõddmõõžžid vuässõõttmõõžž teäggad Mättʼtõs- da kulttuurministeria.